“呢度真系好似冇掩鸡笼咁，点得啲贼仔唔入呢！”喺广州某小区门口，一位阿婆正同物管抱怨。年底又喺治安敏感期，街坊希望保安更加严密啲。白话讲嘅冇掩鸡笼，即系自出自入咁解。讲起“冇掩”，好多街坊都认同一样嘢:小区、住宅确实要加强安保，而公共地方最好就对市民更加开放啲、友好啲。呢一点，近年广州确实好多方面值得表扬。
广州嘅公园，前几年拆嗮围墙，唔再收费，街坊晨运散步来去自如。博物馆同样，只要凭身份证就可以参观；图书馆用身份证就可以办证借书，连押金都悭埋。当年公园拆墙时，曾经有街坊担心，“冇掩鸡笼咁，会唔会成为贼仔窦、垃圾堆？”事实上，经过几年嘅验证，担忧嘅问题基本唔存在，免费开放嘅利，确实远大于弊。拆除围墙，抹去界限，唔单只方便咗街坊，而且充分利用咗资源。以前，博物馆虽然称唔上门可罗雀，但确实十分冷落，家阵街坊游客随意参观，周末休闲，增长见识，真正实现咗呢啲设施嘅公共功能。
当然，“冇掩”并非表示“唔理”，上述场所开放之余，加强管理及服务同样好有必要。就好似图书馆，如果环境嘈杂过墟市，图书甩皮甩骨，咁真系得不偿失。而作为街坊，亦应该树立公德心，遵守公共场所嘅秩序，咁先对得起“冇掩”嘅初衷。